09.09.2026- राज्यपालांनी अग्रगण्य महिला वैज्ञानिक प्रा. एम. लक्ष्मी कांतम यांना सन्मानित केले

09.09.2026- हरित रसायनशास्त्र व शाश्वत अभियांत्रिकी क्षेत्रात अनन्यसाधारण योगदान देणाऱ्या ज्येष्ठ महिला वैज्ञानिक प्रा. एम. लक्ष्मी कांतम यांना बुधवारी राज्यपाल जिष्णु देव वर्मा यांच्या हस्ते रसायन तंत्रज्ञान संस्था येथे आयोजित आंतरराष्ट्रीय परिषदेत सन्मानित करण्यात आले. प्रा. लक्ष्मी कांतम यांच्या सन्मानार्थ रसायन तंत्रज्ञान संस्था माटुंगा मुंबई येथे संस्था तसेच भारतीय रसायनशास्त्र संस्थेतर्फे संयुक्त विद्यमाने आयोजित केलेल्या शाश्वत रसायनशास्त्र व अभियांत्रिकी या विषयावरील आंतरराष्ट्रीय परिषदेच्या वेळी त्यांना सन्मानित करण्यात आले. राज्यपालांच्या हस्ते यावेळी ज्येष्ठ वैज्ञानिक पद्मविभूषण एम एम शर्मा यांना देखील सन्मानित करण्यात आले. परिषदेत महिला वैज्ञानिकांच्या कार्याचा देखील गौरव करण्यात आला. कार्यक्रमाला रसायन तंत्रज्ञान संस्थेचे कुलगुरू प्रा. अनिरुद्ध पंडित, आंतरराष्ट्रीय परिषदेचे अध्यक्ष व भारतीय रसायनशास्त्र संस्थेचे अध्यक्ष डॉ गणपती यादव, विज्ञान व तंत्रज्ञान विभागातील माजी सचिव पदमभूषण डॉ टी रामासामी, राज्यपालांचे सचिव डॉ प्रशांत नारनवरे, वैज्ञानिक, संशोधक, उद्योजक व विद्यार्थी उपस्थित होते.