24.10.2026: राज्यपालांनी पोलीस दलांच्या राष्ट्रीय मोटारसायकल रॅलीला हिरवा झेंडा दाखवून रवाना केले

24.10.2026: दिनांक ३१ ऑक्टोबर रोजी सरदार वल्लभभाई पटेल यांच्या जयंतीनिमित्त गुजरात येथे आयोजित राष्ट्रीय एकता परेड मध्ये सहभागी होण्यासाठी जाणाऱ्या पोलीस दलांच्या राष्ट्रीय मोटारसायकल रॅलीला आज राज्यपाल जिष्णु देव वर्मा यांनी मुंबई येथे हिरवा झेंडा दाखवून रवाना केले. मुंबईहून ही मोटारसायकल रॅली स्टॅचू ऑफ युनिटी गुजरात येथे जाणार असून या रॅलीमध्ये महाराष्ट्रासह १० राज्ये व केंद्रशासित प्रदेशांतील पोलीस पथकांचा समावेश आहे. या मोटारसायकल यात्रेतून राष्ट्रीय एकात्मता आणि ‘नशामुक्त भारत’ हे संदेश दिले जाणार आहेत. कार्यक्रमाला विधानसभेचे अध्यक्ष राहुल नार्वेकर, मुंबई उपनगर जिल्ह्याचे पालकमंत्री मंगल प्रभात लोढा, मुंबईच्या महापौर ऋतु तावडे, पोलीस महासंचालक सदानंद दाते, मुंबईचे पोलीस आयुक्त देवेन भारती, अतिरिक्त पोलीस महासंचालक, राज्य राखीव पोलीस दल राजकुमार व्हटकर, वरिष्ठ पोलीस अधिकारी व कर्मचारी, महाराष्ट्र पोलीस तसेच १० राज्ये व केंद्रशासित प्रदेशांतील पोलीस पथके आणि महाविद्यालयीन विद्यार्थी उपस्थित होते. राष्ट्रीय मोटारसायकल रॅलीसाठी ‘नशामुक्त भारत’ ही संकल्पना निवडल्याबद्दल तसेच अमली पदार्थांच्या तस्करीला आळा घालण्यासाठी अँटी-नार्कोटिक्स टास्क फोर्स स्थापन केल्याबद्दल राज्यपालांनी महाराष्ट्र पोलीस दलाचे अभिनंदन केले. मुंबईहून गुजरातकडे जाणाऱ्या रॅलीमध्ये तमिळनाडू, आंध्र प्रदेश, तेलंगणा, पुद्दुचेरी, अंदमान व निकोबार बेटे, गोवा, कर्नाटक, केरळ आणि लक्षद्वीप यांसह महाराष्ट्र पोलीस दलाचे पथक सहभागी झाले आहेत.