30.09.2026: राज्यपालांनी भारतीय विद्या भवन कॉलेज, अंधेरी येथे ‘टीबीमुक्त मुंबई जनजागृती पदयात्रेत’ घेतला सहभाग

30.09.2026: क्षयरोग (टीबी) हा केवळ आजार नसून सामाजिक समस्या आहे. टीबीमुक्त मुंबईसाठी शासनाच्या प्रयत्नांसोबत समाजातील प्रत्येक घटकाने, विशेषतः तरुणांनी पुढाकार घेऊन जनजागृतीचे दूत बनावे, असे आवाहन महाराष्ट्राचे राज्यपाल जिष्णु देव वर्मा यांनी केले. भारतीय विद्या भवन कॉलेज, अंधेरी पश्चिम येथे मुंबई विद्यापीठाच्या राष्ट्रीय सेवा योजना (एन.एस.एस.), बृहन्मुंबई महानगरपालिका आणि भवन कॉलेज यांच्या संयुक्त विद्यमाने आयोजित ‘टीबीमुक्त मुंबई जनजागृती पदयात्रेत’ सहभागी होताना राज्यपाल बोलत होते. यावेळी राज्यपालांचे सचिव डॉ प्रशांत नारनवरे, मुंबई विद्यापीठाचे कुलगुरू प्रा. (डॉ.) रवींद्र कुलकर्णी, प्र-कुलगुरू डॉ. अजय भामरे, भवन्स कॉलेजच्या गव्हर्निंग कौन्सिलचे अध्यक्ष ॲड. असिफ मुल्ला, प्राचार्या प्रा. (डॉ.) सविता पवार, अभिनेता अपारशक्ती खुराणा, मेघाश्रेय फाउंडेशनच्या संस्थापक सीमा सिंग यांच्यासह शिक्षकवृंद, NSS स्वयंसेवक, NCC कॅडेट्स आणि विद्यार्थी मोठ्या संख्येने उपस्थित होते.